bahut samay pahale kee baat hai. khuniya gaanv ke 8-10 logon kee ek mandalee darshan hetu ek kaalee mandir mein gaee thee. kaalee ka yah mandir ek jangal mein tha par aas-paas mein bahut saaree dukaanen, dharmashaala aadi bhee the, kachchee-pakkee sadaken bhee banee huee theen ... par ghane-uge jangalee ped-paudhe ise jangal hone ka bhaan karaate the.
yah kaalee mandir bahut hee jagata sthaan maana jaata tha. yahaan har samay bhakton kee bheed lagee rahatee thee par mandir ke andar jaane ka samay subah 8 baje se lekar raat ke 8 baje tak hee tha. bhakton kee umadatee bheed ko dekhate hue mandir mein mukhy daravaaje ke alaava ek aur daravaaja khol diya gaya tha taaki bhaktajan mukhy daravaaje se darshan ke lie pravesh karen aur doosare daravaaje se nikal jaen.
khuniya gaanv kee mandalee shaam ko 6 baje darshan ke lie mandir pahunchee aur darshan karane baad mandir ke aas-paas ghoomakar vahaan lage mele ka aanand lene lagee. mele mein ghoomate-ghaamate yah mandalee apane nirbhayapan ka parichay dete hue jangal mein thoda door nikal gaee.
raat hone lagee thee, mandalee ka koee vyakti kahata ki ab vaapas chalate hain, kal din mein ghoom lenge par koee kahata dar rahe ho kya, itane log hain, thoda aur andar chalate hain phir vaapas aa jaenge. aisa karate-karate yah mandalee us jangal mein kaaphee andar chalee gaee.
raat ke andhere mein ab mandalee ko raasta bhee nahin soojh raha tha aur na hee mandir ke aas-paas jalatee koee roshanee hee dikh rahee thee. ab mandalee yah samajh nahin pa rahee thee ki kis or chalen. khair, mandalee ke ek vyakti ne apanee jeb se maachis nikaalee aur jhole mein rakhe kuchh kaagajon ko jalaakar roshanee kar dee.
roshanee mein us mandalee ne jo kuchh dekha, vah bahut hee bhayaavah tha, aas-paas kuchh nar kankaal bhee najar aa rahe the aur pedon par kuchh ajeeb tarah ke daraavane jeev-jantu is mandalee ko ghoorate najar aa rahe the. ab to is mandalee ke sabhee log pooree tarah se chup the.
koee kuchh bolane kee himmat nahin kar raha tha par haan ve log dheere-dheere ek-doosare ke kaaphee kareeb aakar chipak gae the. phir kisee ne thodee himmat karake kaagaj kee boojhatee aag par vaheen pade kuchh sookhe ghaas-phoos ko daala aur phir aag thodee tej ho gaee.
mandalee ne man hee man nishchit kiya ki abhee kaheen bhee jaana khatare se khaalee nahin hai, kyonki ve log raasta bhee bhool gae the aur unhen samajh mein hee nahin aa raha tha ki kis or jaen. astu un logon ne phusaphusaakar yah nirnay liya ki aaj kee raat kaise bhee karake yaheen gujaarenge aur subah hote hee yahaan se nikal jaenge.
choonki ye log gaanv se the aur in logon ka bhoot-preton se kaee baar paala pada tha, isalie thode dare hue to the par itana bhee nahin ki ye darakar chillaane lagen ya bhaagana shuroo kar den. is mandalee ne himmat dikhaee aur dheere-dheere kar ke aag ko aur tej karane lagee, kyonki ab is mandalee ko lagane laga tha ki jaroor yahaan kuchh buree aatmaen hain aur ve is mandalee ko apanee chapet mein lena chaahatee hain.
par vahaan kee aabohava dekhakar yah ganvee mandalee pooree tarah se dar gaee thee aur andar se paseene-paseene bhee ho gaee thee par is dar ko chehare par nahin laana chaahatee thee, kyonki inako pata tha ki dare to mare aur dare hue logon par yah buree aatmaen aur bhee asar karatee hain.
mandalee ke kuchh log ek doosare ka haath kasakar pakad lie the aur pooree tarah se satark the. kuchh logon ne hanumaan chaaleesa aadi padhana aur hanumaanajee ko goharaana bhee shuru kar diya tha to kuchh log us jangal kee kaalee maata kee duhaee de rahe the. achaanak ek bhayaanak aatma unake saamane prakat ho gaee aur raudr roop mein attahaas karane lagee.
us samay ka maahaul aur bhee bhayaanak ho gaya. ab is mandalee ke paseene chehare par bhee dikhane shuru ho gae the, chehare laal hona shuroo ho gae the aur ye log aur kasakar ek doosare ke kareeb aa gae the. abhee vah raudr aatma attahaas karake poore vaataavaran ko aur bhee bhayaanak banae tabhee vahaan kuchh aur bhayaanak aatmaen aa gaeen.
ab to is mandalee kee sittee-pittee gum. ab in logon ko apana kaal apane saamane dikh raha tha. ab vahaan ek nahin lagabhag 5-6 aatmaen aa gaee theen aur apanee ajeeb harakaton se maahaul ko pooree tarah bhayaanak banaakar rakh dee theen.
mandalee ke ek vyakti ne himmat karake kaha ki agar marana hee hai to inaka saamana karake marenge. jisake paas bhee chaakoo aadi hai nikaal lo, dande aadi utha lo aur inaka saamana karo.
darasal us samay log apanee jeb mein chhota sa chaakoo aadi bhee rakhate the aur kuchh log baraabar laathee lie rahate the. is mandalee ke do logon ke paas bhee laathee aur teen ke paas chaakoo the. ab sab pooree tarah se mukaabala karane ke lie taiyaar ho gae the.
par shaayad inhen ladane kee naubat nahin aaee. hua yoon ki jaise hee ek bhayaanak aatma ne inapar hamala kiya ... usaka sir katakar alag gir gaya aur vah bina sir ke hee khoob tej bhaagee tatha usaka sir bhee bhaag nikala.
ab maahaul ekadam se bhayaanak ranamay ho gaya tha kyonki ek gauravarneey vyakti jo koee saadhu jaisa dikhata tha aur keval dhotee pahane hua tha, haath mein talavaar lie in buree aatmaon ko kaate ja raha tha.
dekhate hee dekhate usane saaree buree aatmaon ko kaatakar rakh diya par gaur karane vaalee baat yah thee ki koee aatma maree nahin par sab chillaate hue, ajeeb-ajeeb aavaaj karate hue vahaan se bhaag nikaleen. ab yah mandalee us sajjan mahaatma ke pairon par gir gaee thee aur unhen dhanyavaad de rahee thee.
is mandalee ko us gauravarneey, paraakramee mahaatma ne apane peechhe aane ka ishaara karake aage badhane lage. lagabhag 10 minat chalane ke baad yah mandalee ek kutiya ke paas pahunch chukee thee. vahaan dar ka koee naamo-nishaan nahin tha. us mahaatma ne in logon ko kutiya ke andar aane ka ishaara kiya.
kutiya mein pahunchakar in logon ne apana jhora-jhanta rakha aur chain kee saans lee. phir baaba ne ishaare se hee inhen khaane ke lie pangat mein baitha diya. kutiya ke andar se ek doosare mahaatma nikale aur unhonne kisee ped ke patte ko pattal ke roop mein in logon ke aage rakh diya. phir kya tha, us mahaatma ne us pattal par kuchh alag-alag pedon ke patte rakhe. aisa karate samay is mandalee ko bahut ajeeb lag raha tha par kisee mein himmat nahin thee ki baaba se kuchh poochhe.
phir us mahaatma ne kamandal se jal liya aur kuchh mantr budabudaakar chhidak diya. are yah kya ab to ve pattalen thaal ban chukee theen aur mandalee ke har vyakti ke ichchhaanusaar usamen pakavaan pade hue the. phir baaba ka ishaara milate hee bina koee prashn kie yah mandalee jeemane lagee.
jeemane ke baad baaba ka ishaara paakar vah mandalee vaheen so gaee, par sab sone ka naatak kar rahe the, neend kisee ke bhee aankh mein nahin thee. is kutiya mein door-door tak dar nahin tha par baaba ke kaaranaame dekhakar ve log hataprabh the aur soch rahe the ki subah baaba se is baare mein jaanakaaree lenge.
subah jab soory kee kiranen is mandalee ke chehare par padee to inakee neend khulee. mandalee ka har vyakti bahut hee aashchary mein tha kyonki vahaan na koee kutiya thee aur na hee raat vaale baaba hee. aur ye log bhee neeche vaise hee ghaans-phoos par soe hue the. ab inako samajh mein nahin aa raha tha ki vah kutiya aur baaba gae kahaan.
khair ab in logon ke paas koee chaara nahin thee, thoda-bahut idhar-idhar chhaanabeen karane ke baad inako raasta bhee mil gaya aur ye log mele mein vaapas aa gae. mele mein vaapas aane ke baad ye log kaalee maata ke pujaaree se milakar saaree ghatana batae. pujaaree baaba ne ek lambee saans chhodate hue kaha ki vah divy aatma hai, jo is jangal mein rahatee hai.
vah keval raat mein hee aur vah bhee bhoole-bhatake logon ko hee najar aatee hai aur unhen raat mein aashray pradaan karake phir pata nahin kahaan gaayab ho jaatee hai. us pujaaree baaba ne bataaya ki aisee ghatanaen unhen kaaphee shraddhaalu suna chuke hain. itana hee nahin unhonne kaee baar din ke ujaale mein 9-10 logon ke saath is jangal ka kona-kona chhaan maara hai par kabhee bhee na ve mahaatma mile aur na hee aisee koee kutiya hee dikhee.
khair yah mandalee to kuchh aur hee karana chaahatee thee. is mandalee ne phir himmat karake raat ko jangal mein nikal gaee. mandalee chaahatee thee ki unhen buree aatmaen sataen aur baaba phir aakar unakee raksha karen. isee bahaane yah mandalee yah chaahatee thee ki baaba ke dikhate hee unake pairon par girakar kuchh rahasyon ke baare mein jaanakaaree lee jaegee.
baaba se haath jodakar praarthana kiya jaega ki ve kuchh anasulajhe prashnon ka uttar den. par yah kya abhee yah log jangal mein kuchh door hee aage badhe the ki jo baaba raat ko pattal laakar rakhe the, ve dikh gae aur bole, tum logon ke man-mastishk mein kya chal raha hai, mujhe pata hai .... par aisee bhool mat karo .... kuchh cheejon ko rahasy hee rahane do .... aur sabase aham baat ham aur hamaare ve gurujee is jangal mein isee maata ke darshan ke lie aae the par raat ko jangal mein kuchh daakuon ne hamaaree hatya kar dee thee.
phir ham kabhee is jangal ko chhodakar nahin gae aur raatabhar jaagakar shraddhaaluon ko daakuon aur buree aatmaon se bachaate rahate hain. jay baaba vishvanaath.
jay maan kaalee.
samaapt
yadi aapake paas hindee mein koee lekh, kahaanee, vyaapaar vichaar ya jaanakaaree hai jo aap hamaare saath sheyar karana chaahate hain to krpaya use apanee photo ke saath ee-mel karen. hamaaree pahachaan hai: www.kuchhhnaya1994@gmail.chom pasand aane par ham use aapake naam aur photo ke saath yahaan prakaashit karenge.
dhanyavaad!
0 Comments For "Hindi कहानी :- दिव्य आत्मा "