baat bahut hee puraanee hai. us samay graameen log adhikatar ek jagah se doosaree jagah jaane ke lie bailagaadee aadi ka upayog karate the. koee bhee shubh tyohaar ho, ya koee prayojan,
bada se bada mela jagah-jagah lagata tha aur mela jaane ke lie log lagabhag 10-15 din pahale se hee taiyaaree shuru kar dete the.
kuchh log paidal hee gol banaakar raat ko kha-peekar nikal jaate the aur subah hote-hote mele kee jagah par pahunch jaate the. kuchh log bailagaadee aadi naandhakar nikal jaate the.
ye log mela karane kabhee-kabhee paidal hee 10-12 kos tak chale jaate the aur udhar se kudaal, hansua, hattha (paanee ucheelane ka saadhan), kudee (kheton mein sichaeen ke kaam aanevaala baratan jisamen rassee baandhakar kuen, taalaab aadi se paanee nikaala jaata hai) aadi khetee-kisaanee ke saamaan ke saath hee pahansul, loda aadi bhee khareedate the aur saath hee osaunee ke saath hee baans kee banee any cheejen. har parivaar apane parivaar ke chhote bachchon ke lie lakadee ke bane khilaune aur tipahiya gaadee khareedana nahin bhoolata tha.
aisa nahin hai ki mele aaj nahin lagate par aaj ke mele par aadhunikata pooree tarah se haabee ho gaya hai aur saath hee ye paaramparikata se bahut hee door ho gae hain, par us samay ke melon kee apanee khaasiyat hotee thee. log kuchh vishesh cheejon ko khareedane ke lie kisee vishesh jagah par lagane vaale mele ka intajaar karate the.
bhoot kee pooree kahaanee shuroo karane se pahale mujhe ek chhota bhootahee rochak kissa yaad aa raha hai aur use yahaan sunaana jarooree samajhata hoon- ek baar mere gaanv ke kuchh log raat ko kha-peekar laathee, gamachha, satua aadi baandhakar mela karane nikal gae.
unhen lagabhag 7-8 kos door jaana tha. raat ka samayaur aakaash chaandanee se chakaachaundh. kuchh khet sarason ke peele phool se lad gae the aur prakrti kee shobha mein chaar chaand laga rahe the.
mere gaanv ke log tejee se ghurahuriya raaste, medon aadi se hokar tejee se gaate hue, batiyaate hue badhe chale ja rahe the.
raaste mein ek gadhee padee, ve log gadhee paar kie par kya dekhate hain ki ghoom-phir kar phir se hee gadhee par hee aa jaate the. jab do-teen baar unake saath yah ghatana ghatee to un logon ko aabhaas hua ki unhen bhulauna bhoot hee bhulava raha hai.
darasal bhulauna bhoot ke baare mein aisa kaha jaata hai ki ye log logon ko nukasaan to nahin pahunchaate par unhen raasta bhatakaakar pareshaan karate hain. phir kya tha, tabhee usee gol ke ek bujurg ne apanee chunautee nikaalee, surtee banaaya aur jay ho bhulauna baaba kahakar thodee see surtee vaheen chadha dee aur hanumaanajee ka naam lekar phir se aage badh gae, khair isabaar unhen bhulauna (bhatakana) se bach gae the.
khair mela jaanevaale is gol kee samasya kam hone ka naam hee nahin le rahee thee. mela ke raaste mein ek nadee padatee thee par usaka paat bahut hee chhota tha aur in dinon mein isamen jaanghabhar hee paanee hua karata tha aur aasaanee se koee bhee ganvee vyakti ise paar kar sakata tha, par us din jab ye log nadee ke kinaare pahunche to paat lagabhag 1 meel tak chauda lag raha tha aur us chaandanee raat mein paanee lahara raha tha.
in logon ko kuchh samajh mein hee nahin aa raha tha aur paas mein koee mallaah ya naav bhee najar nahin aa rahee thee. ye log nadee se 10 meetar pahale hee rookakar subah hone ke intajaar mein vaheen baithe-baithe undhane lage. khair subah huee to in logon ko pata chala ki nadee to abhee 100 meetar ke lagabhag door hai aur vaisee hee patalee kee patalee dikhaee de rahee hai.
darasal nadee ke kinaaron ke kheton mein sarason pooree tarah se phoolakar pasaree huee thee aur hava bahane par sarason ke peele phool laharaate the to inhen nadee mein paanee ka aabhaas hota tha par yahaan bhee kisee doosare bhulauna bhoot ne inake saath majaak karake inhen bhulava diya tha .
ab is gol ka har vyakti soch raha tha ki agar raat ko hee thodee himmat karake ham log aage badhe hote to pata to chal jaata ki nadee ka paat na badhakar ye sarason ke khet hain. khair us samay bhulauna bhoot aisee harakaten karake logon ko pareshaan karate hee rahate the to yah naee baat nahin thee.
khair subah ye log phir se tejee ke saath chalana shuroo kie aur dopahar tak ek bade bageeche mein pahunch gae, us bageeche se lagabhag 1 kos par ek doosara bada bageecha (baaree) tha jisamen mela lagata tha. par jyonhee ve log is pahale bageeche mein pravesh karana shuroo kie, inhen bahut taajub hua kyonki is bageeche mein bhee dukaanen sajana shuroo ho gaee theen.
in logon ko kuchh samajh mein nahin aa raha tha ki kya karen. khair inhonne ek dukaanadaar se poochh hee liya ki kya is saal mela isee bageeche mein lagane vaala hai to us dukaanadaar ne haan mein sir hilaakar phir apane kaam mein lag gaya. khair is bageeche mein bhee ek chhota kuaan tha aur paas mein hee devee ka ek chhota thaan bhee.
yah bageecha bhee bahut bada tha aur lagabhag 2-3 kos kee eriya mein phaila tha. din mein bhee andhera ka poora-poora saamraajy lag raha tha. in logon ne kune par pahunchakar daatoon aadi kiya aur aata aadi saanakar vaheen littee banae aur khaakar aaraam karane lage. darasal dukaanen saj rahee theen aur mela shaam ko gulajaar ho jaata tha. har dukaanon par chiraag jal uthate the aur kuchh pedon par lukaare (mashaal) bhee jal uthatee thee.
shaam ko jab ye mere gaanv ke log mela karane nikale to unhen ajeeb lag raha tha kyonki unhen us mele mein apane gaanv-javaar ka koee bhee vyakti nahin dikh raha tha, unhen bahut taajjub ho raha tha kyonki mere gaanv ka bhee kam se kam 2 -3 gol aur paas ke gaanvon ke aneko gol mela mein aae the, koee gol gaanv se pahale chala tha to koee baad mein, par koee pahachaan ka vyakti dikhaee nahin de raha tha.
dukaanadaar bhee ajeeb lag rahe the aur unakee harakaten bhee ajeeb thee. hamaare gaanv ke logon mein ek bujurg yaadavajee the. unhen ab kuchh samajh mein aane laga tha. unhonne gaanv ke sabhee logon ko ek saath rahane kee hee hidaayat dete hue kahe ki dheere-dheere dera kee or badhon.
ham log bhooton ke changul mein phans gae hain. yah apana mela nahin, yah bhooton ko mela hai aur agar ham log samajhadaaree se kaam nahin lenge to ham logon kee jaan ko khatara ho sakata hai.
pata nahin jab ye log us kune kee or badhane lage to dukaanadaar bhee ek-ek karake dheere-dheere inake peechhe hone lage. apane unake haav-bhaav ke saath hee unake aakaar prakaar bhee badalane lage the ab ve apane roop mein aana shuroo ho gae the aur daraavanee harakaten bhee karana shuroo kar die the.
phir mere gaanv ke us bujurg ne logon se kaha ki bina peechhe dekhe, bina dare kuen kee or aage badhon aur vahaan jo devee ka thaan hai vahaan pahunchakar devee maan kee guhaar karo. khair ub bhoot aur bhee daraavanee harakate karane lag gae the, pedon kee daaliyaan todana bhee shuroo kar die the aur ajeebo-gareeb harakaten bhee.
par mere gaanv ke log bina dare tejee se us kune kee or badhen aur kuen par pahunchate hee vahaan bane devee thaan ke paas chppal aadi nikaal kar devee maan ko goharaane lage. us bageeche mein ek ajeeb hee bhayaavah sthiti paida ho gaee thee, andhera pooree tarah se chha gaya tha aur pedon kee daaliyaan tejee se aapas mein takara rahee theen.
mer gaanv ke log ab haath jodakar us devee thaan par jhuk gae the. sabakee aankhen band theen aur ve bas devee maan se apanee jaan kee bheekh maang rahe the.
bhoot bhee aas-paas mein ekatr ho gae the par koee is thaan ke paas aane kee koshish nahin kar raha tha par door se in logon ko daraane mein lage the. ekaek ek tej aandhee uthee, aisa laga ki poore bageeche mein bhoochaal aa gaya, kuchh pedon kee daaliyaan tejee se aavaaj karate hue toot kar gir gaeen.
aur dekhate hee dekhate mere gaanv vaalon ke kaan mein kisee mahila kee sumadhur aavaaj gunjaayamaan huee, "utho, yahaan pade-pade kya kar rahe ho, mela to us bageeche mein laga hai. main bhee usee bageeche mein chalee gaee thee. "isake baad mere gaanv vaalon ke jaan mein jaan aaee.
ab bageeche mein shaanti pasaree huee thee par unhen koee dikhaee nahin de raha tha. phir ek adbhut roshanee prakat huee, roshanee ke prakat hote hee mere gaanv ke bujurg ne kaha ki apana saamaan samete aur bina der kie is roshanee ke peechhe-peechhe nikal padon.
phir mere gaanv ke logon ne apana saamaan sameta aur us roshanee ke peechhe-peechhe ho lie. jab ve log mele baale bageeche ke paans pahunche to vah roshanee gaayab ho gaee. ab mere gaanv ke log raahat kee saans le rahe the kyonki lagabhag kaaphee raat bhee ho chukee thee aur is bageeche mein mela bhee paravaan chadh chuka tha.
jyonhee hamaare gaanv ka yah gol mele mein pravesh kiya vaheen hareesh khareedate hue mere gaanv ke ramesar baaba mil gae. phir ramesar baaba mere gaanv ke is gol ko lekar dera par gae jahaan mere gaanv ke any gol bhee aakar thahare hue the. phir apana saamaan vahaan rakhakar ye log mela karane nikale.
darasal dera banaane se yah phaayada hota tha ki har vyakti kee 1-2 ghante is dera par rahane kee jimmedaaree hotee thee aur log apana saamaan tatha khareeda hua saamaan bhee yaheen laakar rakhakar phir mele mein chale jaate the aur agar kisee ko khaana-peena bhee hota tha to yaheen yaani dere par hee aa jaata tha.
yah mela maheenon chalata tha. khair doosare din subah mere gaanv ke us bujurg gaanv vaalon ke saath mela ke aayojakon ke paas pahunche aur unhen raat kee ghatana bataee. mela ke aayojakon ne kaha ki ham log mela ka aayojan isee se to us bageeche mein nahin karate, kyonki us bageeche mein bahut saare bhooton ka dera hai. din mein bhee us bageeche mein akele koee jaana nahin chaahata hai.
us bageeche ke bhoot kaaphee logon ko pareshaan kie hain. phir mere gaanv ke us bujurg ne kaha ki hamen bhooton se darane kee jaroorat kya hai. us bageeche mein ek devee maan ka thaan hai, kuna bhee hai. aap log kyonki us devee thaan par pooja aadi ka aayojan karake mela ka aayojan vaheen karate hain.
maan ham sabakee raksha karegee aur bhooton ko bhee vahaan se nau-do-gyaarah hona padega. mela aayojakon ko yah baat bahut hee janch gaee aur un logon ne socha ki jo maan us bageeche se is bageeche mein mela ka aanand uthaane aatee hai to kyon nahin mele ka aayojan usee bageeche mein kiya jae.
tabhee se isee bageeche mein mela lagana shuroo ho gaya hai. sab par maan kee krpa hai. maan ke thaan par ek chhota mandir bhee ban gaya hai, mele ke dauraan poora bageecha maanmay ho jaata hai. agarabattiyon, kapooron ke jalane se poore bageeche ka maahaul deveemay ho jaata hai.
log mela bhee karate hain aur maan ke darshan bhee. nauraatri chal raha hai. maan kee krpa aap sab par banee rahe. jay maata dee.
aap paathakon se saadar anurodh hai ki yah bataana na bhoolen ki yah kaalpanik par sunee-sunaeen kahaanee aapako kaisee lagee? mere dvaara prastut bhatahee kahaaniyon ka kuchh na kuchh jaroor aadhaar hota hai, main bhale kahata hoon ki ye kaalpanikata par aadhaarit hain par vah mere shabdon mein hota hai kyonki kahaanee kisee na kisee sunee huee ghatana se prerit hotee hai.
jay maata dee.
samaapt
yadi aapake paas hindee mein koee lekh, kahaanee, vyaapaar vichaar ya jaanakaaree hai jo aap hamaare saath sheyar karana chaahate hain to krpaya use apanee photo ke saath ee-mel karen. hamaaree pahachaan hai: www.kuchhhnaya1994@gmail.chom pasand aane par ham use aapake naam aur photo ke saath yahaan prakaashit karenge.
dhanyavaad!
0 Comments For "Hindi कहानी :- भूतों से रक्षा करने वाली, जय माँ काली "